ПРОМОЦИЈАТА НА 6-ТИОТ И НА 7-МИОТ ТОМ ОД ЗБИРКИТЕ СО БЕСЕДИ „СЛОВА ЗА СЛОВОТО“
На 6.10.2024 година, Неговото Високопреосвештенство Митрополитот Брегалнички господин Иларион присуствуваше на промоцијата на 6-тиот и на 7-миот том од збирките со беседи „Слова за Словото“ во авторство на Неговото Блаженство, Архиепископот Охридски и Македонски г.г. Стефан, во свечената сала на Музејот на македонската борба за самостојност во Скопје.
На промоцијата, свој промотивен збор зедоа двајца промотори – игуменот на Мариовскиот манастир „Свети Никола“, Неговото Преосвештенство, Епископот Велички г. Никола и презвитерот Милан Ѓорѓевиќ, професор на Богословскиот факултет „Свети Климент Охридски“ – коишто го искажаа своето богословско-книжевно гледиште врз двете новообјавени книги. Потоа следуваше и свечено обраќање на авторот на книгите – Архиепископот Стефан – кој говореше за богословењето како најавтентичен вид на богославење, но и за разноликиот карактер на беседите во книгите.
Свеченоста беше збогатена и со прекрасните изведби на Архиепископскиот црковен хор „Свети Климент Охридски“.

